Украина президенти Владимир Зеленский Донбассдаги Бирлашган кучлар операцияси қўмондони генерал-майор Эдуард Москалевни лавозимдан олди. Бу борадаги фармойиш президент офиси сайтида эълон қилинган.

«Генерал-майор Москалев Эдуард Михайлович Бирлашган кучлар қўмондони лавозимидан бўшатилсин», — дейилади фармойиш матнида. Ҳужжатда генералнинг нима сабабдан бўшатилгани кўрсатилмаган.

Москалев қўмондон лавозимига 2022 йил 15 мартда тайинланган эди. Бунга қадар ушбу лавозимда ҳозирда Киев мудофаа кучлари ва воситалари гуруҳининг қўмондони Александр Павлюк ишлаган.

Тайинловга қадар Москалев «Восток» тезкор қўшинлар қўмондонлиги қўмонининг биринчи ўринбосари — штаб бошлиғи эди. 2022 йил баҳорда Зеленский уни II даражали Богдан Хмелницкий ордени билан тақдирлаган.

Аввалроқ Хитой Украина можаросини ҳал этишнинг 12 банддан иборат режасини эълон қилганди. Шунингдек, Украина ташқи ишлар вазири Дмитрий Кулебанинг айтишича, Хитой Россия билан муносабатларидан келиб чиқиб, можарони ҳал этишда муҳим роль ўйнаши мумкин. Бундан ташқари, Хитойнинг БМТдаги вакили ўринбосари Дай Бин ташкилот Бош Ассамблеяси йиғилишида Украинага қурол-яроғ етказиб бериш орқали тинчликка эришиб бўлмаслигини маълум қилганди.