Тошкент шаҳрида 2022 йилнинг 6 ойида 3 нафар она фарзандини тез ёрдам машинасида дунёга келтирди. Бу ҳақда Соғлиқни сақлаш вазирлиги ахборот хизмати хабар берди.

Қайд этилишича, олти ой давомида Тошкент шаҳар «103» хизматига туғуруқ ва ҳомиладорлик патологиялари бўйича жами 21 минг 143 та чақириқ келиб тушган. Шундан 38-40 ҳафталик ҳомиладорлик даврида бўлган 2342 нафар аёл туғуруқ учун мурожаат қилган.

Қолаверса, тез тиббий ёрдам хизмати ходимларининг бевосита саъй-ҳаракати туфайли 25 нафар ҳомиладор аёл ўз уйида фарзандли бўлган.

Кутилмаганда бошланган туғуруқ ва яна бошқа омиллар сабабли эса 3 нафар она чақалоғини тез ёрдам машинасида дунёга келтирган. Туғуруқ жараёнларининг барчаси муваффақиятли ва ҳеч қандай асоратларсиз кечган.

Маълумот ўрнида, 2022 йил январь-июнь ойларида Тошкент шаҳар тез ёрдам хизматига жами 622 минг 578 та чақириқ келиб тушган.