Қорақалпоғистонда 18 ёшли йигит ўзганинг картасидан операция учун йиғилган пулларни ўзлаштирди. Бу ҳақда Ички ишлар вазирлиги Киберхавфсизлик маркази ахборот хизмати хабар берди.

Қайд этилишича, Нукус шаҳрида яшовчи фуқаро Н.Ж. ариза билан мурожаат қилиб, Тelegram’да набирасининг операциясига ёрдам сўраб «Муҳтож инсонларга ёрдам» гуруҳида банк картаси ва телефон рақамларини жойлаштирган.

Шундан сўнг номаълум шахс фуқаро Н.Ж.га қўнғироқ қилиб, катта миқдорда пул маблағларини ўтказиб беришни ваъда қилиб, унинг ишончига кириб, телефон рақамига келган SMS-хабарномани қўлга киритиб, жами 6,3 миллион сўм пулларини ўзлаштирганини билдирган.

Шунингдек, тезкор-қидирув тадбирлари натижасида фирибгарлик йўли билан пулларни ўзлаштирган шахс муқаддам Жиноят кодексининг 168-моддаси (фирибгарлик) билан бир неча маротаба судланган Элликқалъа туманида яшовчи 18 ёшли А.Ж. эканлиги аниқланган.

Унга нисбатан Жиноят кодексининг 168-моддаси (фирибгарлик) 3-қисми билан жиноят иши қўзғатилиб, тергов ҳаракатлари олиб борилаётгани маълум қилинган.

Аввалроқ Фарғонада пластик картадан пул ечиб олган аёлга жиноят иши қўзғатилгани, Бухорода ўзгаларнинг пластик картасидан пулларни ечиб келган талаба фош этилгани, Фарғонада ўзганинг пластик картасидаги 6,5 млн сўмни ечиб олган шахсга жиноят иши очилгани тўғрисида хабар берилганди.