Қашқадарё вилояти Деҳқонобод туманида 17 туп Зарафшон арчаси кесиб ташланиши оқибатида табиатга 18 миллион 84 минг сўм зарар етказилди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги матбуот хизмати хабар берди.

Маълум қилинишича, Қашқадарё вилояти экология бошқармаси Деҳқонобод тумани инспекцияси ходимлари томонидан навбатдаги экологик назорат рейд тадбири ўтказилган.

Рейд давомида Деҳқонобод давлат ўрмон хўжалиги «Кон» ўрмон бўлимининг «Сувлисой» массиви ҳудудида табиий ҳолда ўсган 6 туп Зарафшон арчаси таг қисмидан, 11 туп арчанинг эса ён шохлари кесиб ташлангани аниқланган.

Ҳолат юзасидан ўрмон қўриқчиси Р.Ж. га нисбатан Маъмурий жавобгарлик тўғрисидаги кодекснинг 79-моддаси (Дарахтларни, буталарни, бошқа ўсимликларни ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказиш) билан маъмурий баённома расмийлаштирилиб, 3 млн 300 минг жарима қўлланилган.

Шунингдек, табиатга етказилган 18 миллион 84 минг сўм зарарни ундириш мақсадида ҳужжатлар тегишли тартибда расмийлаштирилиб, Деҳқонобод Давлат ўрмон хўжалигига ўтказилган.

Эслатиб ўтамиз, аввалроқ Самарқандда 55 йиллик қайрағоч дарахтлари кесиб ташланганди. Сурхондарёда эса 8 туп қарағай кесилган.