Америкалик миллиардер Илон Маск 20 октябр куни Tesla акциялари қийматининг тушиб кетиши оқибатида бир кунда 16,1 миллиард доллар йўқотди. Бу ҳақда Bloomberg хабар берди.

Қайд этилишича, 209,6 миллиард доллар бойлиги билан дунёнинг энг бадавлат одами бўлиб турган Маск Tesla акциялари нархининг 9,3 фоизга тушиб кетиши сабабли 16,1 миллиард доллар йўқотган. Солиштириш учун, бу миқдор Мўғулистоннинг қарийб бир йиллик ялпи-ички маҳсулотига (16,8 миллиард доллар) тенг.

Маълумот учун, Илон Маск Tesla’нинг 13 фоиз акциясига эгалик қилади ва ўзининг асосий даромадини шу компаниядан олади. Tesla компанияси 2023 йилнинг биринчи чорагида сотувлар камайганини эълон қилди. Компания бу даврда 435 минг 59 та электромобил сотган. Нархларнинг бир неча бор пасайиши ортидан акциялар қиймати ҳам тушиб кетган.

Аввалроқ Tesla’ни «рецессияга чидамли» деб атаган Маск 19 октябр куни юқори фоиз ставкаларининг талабга таъсиридан хавотир билдирган. Унинг хавотири компания акциялари нархининг тушиб кетишига сабаб бўлди. Бу сўнгги уч йил ичидаги энг катта йўқотиш дея баҳоланди.

Шунга қарамай, Маскнинг даромади 2023 йилда 70 миллиард долларга кўпайган. Бу гарчи компания молиявий асосларининг заифлашувига қарамай, Tesla акцияларининг жонланиши билан боғлиқ.

Қийинчиликларга қарамай, Tesla йил охиригача 1,8 миллионта электромобил етказиб бериш режасига содиқ қолади. Шунингдек, узоқ кутилган Tesla Cybertruck электр пикапи ҳам ноябр ойида намойиш қилинади.