АҚШ президенти маъмурияти Россия ва Хитойга компьютер чипларини сотишни чеклади. Бу ҳақда «The New York Times» хабар берди.

Маълум қилинишича, «Nvidia» ва «AMD» компанияларига маҳсулотини сотиш тақиқланган. Компания чиплари энг йирик суперкомпьютерларда ҳамда юз ва нутқни аниқлаш тизимларида қўлланилади.

«АҚШ ҳукумати талаби маҳсулотнинг Хитой ва Россияда ҳарбий мақсадда фойдаланиш учун ишлатилиши ёки жўнатилиши хавфини бартараф этишдан иборат», дейилади «Nvidia» хабарида.

«AMD» чекловлар компания бизнесига жиддий таъсир кўрсатмаслигини қайд этган.

АҚШ Россия ҳарбий техникасида Америка чипларидан фойдаланишни текширмоқда. Тадқиқотчилар АҚШ ва Европа Иттифоқидаги 70 хил компаниялар томонидан ишлаб чиқарилган компонентларни аниқлаган.

Россия ўз ҳарбий техникаларида четдан келтирилган музлатгичлар ва идиш ювиш машиналарининг чипларидан фойдаланаётгани маълум қилинган. 2021 йил февраль охирида санкциялар жорий этилганидан бери АҚШнинг Россияга технология экспорти қарийб 70 фоизга қисқарган.

Аввалроқ АҚШда одамлар миясига чип ўрнатиш бошланганди. Шунингдек, Олимлар фалаж одамнинг миясига хаёлларни ўқийдиган чип ўрнатганди.