Беларусь Президенти Александр Лукашенко Республиканинг Шанхай ҳамкорлик ташкилотига аъзо бўлишини маълум қилди.

Президентга кўра, Беларусь «Шанхай оиласи»нинг тўлақонли аъзосига айланиш вақти келган. Шанхай ҳамкорлик ташкилотига аъзо бўлиш катта муваффақият ҳисобланади.

«Бизни бу йўлда қўллаб-қувватлаётганингизни биламиз ва бунинг учун сиздан жуда миннатдормиз. Биз 12 йил олдин ШҲТ билан ҳамкорликни бошлаганмиз. Ўз-ўзидан ёки тасодифан эмас. Ўшанда бу ташкилот ёш эди, дунё ҳамжамиятида ўз ўрнини топишга уринаётган эди. Бугун эса ШҲТ нуфузли тузилмага айланди, унга катта умидлар билан қарашмоқда», – деган Беларусь раҳбари Шанхай ҳамкорлик ташкилоти бош котиби Чжан Мин билан учрашувда.

Аввалроқ Шавкат Мирзиёев Шанхай ҳамкорлик ташкилоти саммитида иштирок этиш учун мамлакатга келган Беларусь Республикаси Президенти Александр Лукашенко билан учрашув ўтказгани ҳақида хабар берилган.