Европа Иттифоқининг ташқи ишлар ва хавфсизлик сиёсати бўйича олий вакили Жозеф Боррел Россияга киритилган санкциялар оқибатида учинчи мамлакатлар иқтисодига етказилган зарар қопланишини маълум қилди. Бу ҳақда «Интерфакс» хабар берди.

Маълум қилинишича, Жозеф Боррел Россияга қарши қўлланган санкциялар Қозоғистонга таъсир қилиш эҳтимоли ҳақидаги саволга «Санкциялар учинчи мамлакатлар иқтисодиётига йўналтирилмаган. Агар бунинг оқибатида етказилган зарар мавжуд бўлса, биз уни қайтариб берамиз», дея жавоб берган.

Унинг таъкидлашича, Россияга қарши санкциялар қишлоқ хўжалиги ёки ўғитларга қаратилган эмас, улар санкцияларга тушмайди. «Шундай қилиб, бизнинг санкцияларимиз бутун дунё бўйлаб озиқ-овқат етишмовчилигига олиб келади деган ҳар қандай даъво ҳақиқатга тўғри келмайди», деди Боррел пайшанба кунги матбуот анжуманида.

Маълумот учун, Жозеф Боррел ҳозирда расмий ташриф билан Қозоғистонда бўлиб турибди.

Эслатиб ўтамиз, аввалроқ Европа Иттифоқининг Россияга нисбатан баъзи санкцияларни юмшатганига нисбатан Украина президенти девони раҳбари маслаҳатчиси Михаил Подоляк эътироз билдриганди. Европа Иттифоқи Россияга нисбатан санкцияларни олиб ташлаш шартини маълум қилганди. Шунингдек, Европа Иттифоқи элчилари Россияга қарши янги санкцияларни келишиб олгани ҳақида хабар берилганди.