АҚШнинг чет элдаги бир қатор вакилларида номаълум мия касаллиги аниқлангани ҳақида маълум қилинганди. Ҳамда бу бўйича текширув бошлангани айтилган. Қайд этилишича, мазкур касаллик Германиядаги АҚШ дипломатларида ҳам аниқланди. Бу ҳақда «The Wall Street Journal» хабар берди.

Маълум қилинишича, АҚШнинг Германиядаги камида икки нафар давлат хизматчиси сўнгги ойларда бошдан кечирган кўнгил айниши, кучли бош оғриғи, қулоқ оғриғи, чарчоқ, уйқусизлик ва летаргия бўйича тиббий ёрдамга мурожаат қилган. Таъкидланишича, бу Америка қўшинлари жойлашган НАТО мамлакатида аниқланган биринчи ҳолат ҳисобланади.

Нашр хасталикка чалинганларнинг баъзилари Россия билан боғлиқ масалалар, хусусан, газ экспорти, киберхавфсизлик ва сиёсий аралашувлар билан шуғулланган разведка ходимлари ёки дипломатлар бўлганини айтган. Журналистлар суҳбатлашган беморлардан бири яқинда Мериленд штатидаги Миллий ҳарбий госпиталига даволаниш учун кўчиб келган. Газетага берган интервьюсида элчихона ходими шифокорлар унга портлаш зарбаси тўлқинлари таъсирида бўлган одамларнинг жароҳатларига ўхшаш краниокеребрал шикастланиш ташхисини қўйишганини айтган. Март ойида у қулоқларида кучли оғриқ, кучли шовқин ва босимни сезган. Бир оз вақт ўтгач, элчихона уни Вашингтонга қайтариб юборган.

«Нима бўлишидан қатъи назар, бу терроризмнинг бир шакли. Оғир жароҳатлар келтирилди, бу баъзиларимизнинг ҳаётини ўзгартирди», дейилган хабарда.

Аввалроқ Канадада номаълум мия касаллиги аниқлангани маълум қилинган. Шунингдек, Россияда 2 киши камёб гафф касаллиги аломатлари билан касалхонага ётқизилгани ҳақида хабар берилганди.