Ўзбекистоннинг Истанбул шаҳридаги Бош консулхонаси Истиқлол кўчасида содир бўлган портлаш оқибатида яраланган ва шифохонага келтирилган шахслар ҳақида маълумот олди — улар орасида Ўзбекистон фуқаролари қайд этилмаган.

Маълум қилинишича, воқеа оқибатида яраланган 81 нафар шахснинг 8 нафари хорижий давлат фуқароларидир.

Расмий маълумотларга кўра, ҳодиса оқибатида 6 киши вафот этган ва 81 нафар яраланган. Бундан ташқари, турли хил енгил даражадаги шикастлар олиб шифохонага мурожаат қилмаган ҳолда тиббий ёрдам олган Ўзбекистон фуқаролари ҳам борлиги аниқланган.

«Бош консулхона ушбу мудҳиш жиноят оқибатида қурбон бўлган қардошларимизнинг оила аъзолари ва яқинларига ҳамдардлик билдиради, жабр кўрган фуқароларга тез соғайиб кетишни тилайди. Ватандошларимиздан шахсий хавфсизликларига эътиборли бўлишларини сўраб қоламиз», дейилади хабарда.

Эслатиб ўтамиз, 13 ноябрь куни Истанбулнинг Истиқлол кўчасида — шаҳарнинг асосий пиёдалар кўчасида портлаш содир бўлганди. Аввалроқ Ўзбекистоннинг Истанбулдаги Бош консулхонаси ҳодиса оқибатида жабрланганлар орасида ўзбекистонликлар йўқлигини маълум қилганди. Кейинроқ портлашда Ўзбекистон фуқароси Ислам Капарзо ҳам жабрлангани тўғрисида хабар берилди. У ўзининг Telegram’даги канали орқали воқеа қандай содир бўлганини сўзлаб берган.