Канаданинг Нью–Брунсвик вилоятида номаълум касаллик кенг миқёсда тарқалишни бошлади. Бу ҳақда «The New York Times» хабар берди.

Невролог Нил Кашманнинг сўзларига кўра, ушбу хасталикка чалинган беморларда хотира бузилиши, ақлий зўриқиш гўёки мия ва умуртқанинг танани бошқариш қобилиятини йўқотаётган шаклдаги каби намоён бўлади.

«Одамлар хавотирга тушмоқда. Улар бу атроф-муҳит билан боғлиқми ёки наслийми? Сифатсиз гўшт ёки балиқ истеъмол қилиш бунга сабаб бўлганми? шаклидаги саволлар бермоқда», — дея таъкидлаган касаллик кенг тарқалган шаҳарлардан бирининг мэри Айвон Годин.

Қайд этилишича, касаллик илк марта 2015 йилда аниқланган ва шундан буён умумий касалланиш сони 48 тага етган, шу жумладан, олти киши ҳалок бўлган. Мутахассислар симптомлар қаторига уйқусизлик, хотира йўқолиши, чарчоқ, галлюцинация (дунёни алдамчи идрок этиш) ва инсон харакатланиш тизимининг бузилишини киритган. Шу билан бирга, шифокорлар касалликнинг намоён бўлиши бир-биридан кескин фарқланиши сабабли унга аниқ ташхис қўёлмаган.

Аввалроқ АҚШнинг чет элдаги бир қатор вакилларида номаълум мия касаллиги аниқланганди. Шунингдек, АҚШда коронавирусга қарши эмланганларда юрак муаммолари қайд этилган.