Мисрлик археологлар узоқ вақт давомида йўқолган деб ҳисобланган Миср маликаси Клеопатранинг қабрини топгани айтилмоқда. Бу ҳақда The Mirror нашри хабар берди.

Қайд этилишича, олимлар биргаликда ўз жонига қасд қилган Марк Антоний ва Клеопатранинг дафн этилган жойини топганига ишонмоқда. Эндиликда қабрлар очилиши кутилмоқда.

«Антоний ва Клеопатранинг узоқ вақтдан бери йўқолган қабри охир-оқибат топилади. Ниҳоят дафн этилган жой Искандариядан 30 км узоқликдаги Тапосирис Магна минтақасида экани тахмин қилинмоқда. Мен тез орада Антоний ва Клеопатра қабрини топаман деб умид қиламан. Улар бир қабрда дафн этилганига ишонаман. Қабрнинг аниқ жойини аниқлашга жуда яқинмиз; биз тўғри йўлдамиз. Аниқ қаерни қазишимиз кераклигини биламиз», – дейди мисрлик археолог Заҳи Ҳаувасс.

Маълумот учун, Клеопатра VII Птоломейлар сулоласининг сўнгги ҳукмдори бўлган. У ва Рим етакчиси Октавиан Августнинг рақиби Марк Антоний бир-бирларини севгани айтилади. Марк Антонийга Римнинг шарқий провинциялари, яъни Клеопатра бошқарувидаги Мисрни идора қилиш топширилган. Антоний эса мазкур ҳудудни Клеопатрага туҳфа қилган. Шу сабабли икки ўртада милоддан аввалги 31 йилда Юнонистон қирғоқларида уруш келиб чиқади ҳамда унда енгилган Антоний ва Клеопатра ўзларини илонга чақтириш орқали жонларига қасд қилади.

Баъзи фаразларга кўра, уларнинг иккови васиятига биноан Искандария шаҳрида дафн этилгани айтилади. Бошқа тахминларга кўра эса улар ўлдирилган бўлиши мумкин.