Май ойида Қозоғистон Ўзбекистонга 65,02 минг тонна буғдой унини экспорт қилган, бу апрель ойига нисбатан 37%га кўпроқ. «АПК-Информ» нашри ушбу рақам нафақат ушбу мавсум бошидан буён, балки сўнгги бир неча мавсум давомидаги рекорд ойлик кўрсаткич ҳисобланишини алоҳида қайд этмоқда.

Умуман олганда, 2022-2023 йилнинг 9 ойи давомида (сентябр-май ойлари) Ўзбекистон 406,6 минг тонна қозоқ унини импорт қилган. Ўтган мавсумнинг шу даврида Қозоғистон Ўзбекистонга 319,2 минг тонна ун (2022 йилнинг май ойида 33,73 минг тонна) етказиб берган.

Ҳозирда Ўзбекистон Қозоғистон буғдой унини импорт қилувчи давлатлар рўйхатида Афғонистондан кейин 2-ўринни мустаҳкам эгаллаб турибди.

Расмий статистик маълумотларга кўра, Қозоғистондан Ўзбекистонга буғдой экспорти ҳам сезиларли даражада ошган. 2022-2023 йилнинг 9 ойи якунларига кўра, Ўзбекистон Қозоғистон ғалласининг етакчи импортчисига айланиб, мамлакат умумий 3,094 миллион тонна буғдой қабул қилиб олган. Ўзбекистон Қозоғистондан шу йилнинг май ойида 395,12 минг тонна буғдой импорт қилиб,  сўнгги 5 ойдаги энг юқори кўрсаткичга эришган. Маълумот ўрнида, ўтган мавсумнинг шу даврида Ўзбекистон Қозоғистондан 2,21 миллион тонна буғдой сотиб олган.