Россиянинг 1-гвардия танк армияси қўмондонлиги Украина билан чегарага қўшимча техника жойлаштирмоқда. Conflict Intelligence Teaм (CIT) тадқиқотчилари бу ҳақда маълумот берди.

Маълум қилинишича, CIT ҳарбий техникани темир йўл орқали етказиб берилаётгани акс этган бир нечта видеоларни тақдим этган. Жумладан, 11 февралда олинган видеода «Мста-С» ўзиюрар артиллерия мосламалари ва «Т-80У» танклари бўлган эшелонини кўриш мумкин.

«Майдондан бўш танк ташувчиси кетмоқда. Бу станцияга техника олиб келинишини билдиради. Олиб кетилаётганини эмас», — дея таъкидлаган CIT вакиллари.

Таъкидланишича, 4-гвардия танк дивизиясининг «Т-80У» танклари Белгород вилояти ва Веселая Лопань шаҳрида Украина билан чегарадан 15 километр узоқликдаги поездларда кузатилган. Мутахассислар темир йўл маълумотлар базасини текшириб кўриб, эшелонлар Москва вилоятининг Селятино ва Кубинка-2 станцияларидан 4-гвардиянинг доимий жойлашуви ҳудудига йўл олганини аниқлаган.

«Бу Воронеж яқинидаги полигонда мавжуд танклардан ташқари 1-гвардия танк армиясининг қўшимча техникаси жойлашитирганини билдиради. Ускунанинг чегарага бундай жойлашуви гўё АҚШ разведкасининг келаси ҳафта Украинага қарши операция ўтказиши ва Киевдан хорижий элчихоналарнинг эвакуация қилиниши ҳақидаги огоҳлантириши фонида алоҳида хавотир уйғотади», — деб хулоса қилган экспертлар.

Маълумот учун, Россия президенти Владимир Путин 2014 йилда  1-гвардия танк армиясини тузиш тўғрисидаги фармонни имзолаган. Бу Россия Қуролли кучлари таркибидаги ягона танк армияси ҳисобланади.

Аввалроқ Беларусь ва Қримдаги Россия қўшинларининг сунъий йўлдошдан олинган янги суратлари эълон қилинганди. Шунингдек, Россия армиясининг Украинага эҳтимолий ҳужум йўналиши акс этган харита намойиш қилинган.