Россиялик сиёсатшунос Алексей Ярошенко маҳаллий нашрлардан бирига берган интервюсида Марказий Осиё республикаларидан бориб, Россияда меҳнат қилаётган муҳожирларга пул ўтказмалари учун 30 фоизлик комиссия тўловини жорий этишни таклиф қилди.

Ярошенконинг айтишича, Россияда меҳнат муҳожирлари билан боғлиқ ҳолат «муаммоли» ҳисобланади. У буни 2022 йилда Россияда оила аъзоларини ҳисобга олмаганда 3,5 миллион қонуний меҳнат муҳожири бўлгани билан изоҳлаган. У, шунингдек, 2022 йилнинг ўзида Марказий Осиёдан борган икки миллионга яқин меҳнат муҳожири мамлакатда ишлаш учун патент олганини қўшимча қилган.

«Сўнгги бир неча йил ичида ноқонуний муҳожирлар сони йилига ўртача 800 мингдан ортиқ бўлиб қолмоқда. 3,5 миллион расмийдан ташқари, яна бир миллионга яқини ноқонуний ҳисобланади», – дейди Ярошенко.

У муҳожирлар сони ошиши билан бирга улар томонидан содир этиладиган жиноятлар сони ҳам кўпайиб бораётганини таъкидлаган. Жумладан, 2022 йилда Россияда меҳнат муҳожирлари томонидан содир этилган оғир ва ўта оғир жиноятлар, хусусан, қотилликлар сони 21 фоизга ошганини келтириб, уларни Федерал жазони ижро этиш хизмати тизимида сақлаш Россия бюджети учун ҳар йили 500 минг рублга тушиши, умумий харажатлар эса 15 миллиард рублни ташкил этишини айтган.

Ярошенконинг сўзларига кўра, меҳнат мигрантлари яна бир қанча «муаммо»ларни келтириб чиқаради. Биринчи навбатда, сиёсатшунос уларнинг маданияти ва менталитети Россияга мослашмагани, буни тўғрилаш учун эса ҳеч нарса қилинмаётганини танқид қилган. Бундан ташқари, у 2023 йил бошида 563,6 мингдан ортиқ Россия фуқаролари «ишсиз» сифатида рўйхатга олингани, аммо иш берувчилар Путиннинг русларнинг фаровонлигини ошириш тўғрисидаги буйруғини бузиб, биринчи навбатда чет элликларни иш билан таъминлаётганини таъкидлаган.

«Россия фуқароси Марказий Осиё фуқаросига қараганда кўпроқ маош олади. Бу шуни англатадики, биз иккинчисини [ишга] олишимиз ва маошни оширмаслигимиз керак. Буни виждонсиз тадбиркорлар қилади», – дея тушунтиради у.

Мазкур «муаммо»ни ечиш учун у Россия меҳнат бозори жозибадорлигини пасайтиришни, бунинг учун эса Россиядан ташқарига йўналган пул оқимига тўсиқ қўйишни таклиф қилган. Яъни, бунда Ўзбекистон, Тожикистон, Қирғизистон, Туркманистон фуқаролари ва фуқаролиги бўлмаган шахслар учун ватанларига пул ўтказмаларини амалга оширишда комиссия тўловини жорий қилиш кераклигини айтган.

«Агар Россия банкининг мижози ўз уйига пул ўтказса, у ўтказма мақсадидан қатъи назар, сумманинг 30 фоизини тўлаши керак. Банк бу пулни федерал бюджетнинг махсус жамғармасига ўтказади, бу эса пулнинг Россияда қолишига ёрдам беради. Худди шу нарса 2012-2014 йилларгача катта миқдорда пул ўтказган Украина фуқаролари билан содир бўлган. Биз буни мамлакат билан яхши қўшничилик муносабатларини сақлаш йўлларидан бири деб ўйлагандик. Йўқ, ҳеч нарса бундай бўлмади: миллиардлар оқиб кетди ва ҳозирда барча украиналиклар биздан нафратланишади», – дейди Ярошенко.

Эслатиб ўтамиз, аввалроқ Шавкат Мирзиёевнинг маслаҳатчиси Қаҳрамон Қуронбоев Россия ҳукуматидан ушбу мамлакатда ўзбек диаспораси вакилларининг ҳисобидан меҳнат муҳожирларининг фарзандлари учун боғча ва мактаблар қуришда ёрдам сўраган эди. Бунга жавобан эса россиялик депутат Михаил Делягин Ўзбекистон ҳукуматини мигрантларини Россиядан «олиб кетишга» чақирган. Унинг гапларига нисбатан эса ўзбекистонлик депутатлар Алишер Қодиров ва Бобур Бекмуродовлар жавоб қайтарган.