Президент Иқтисодий ҳамкорлик ташкилотининг ўн олтинчи саммитидаги нутқи глобал тинчлик ва хавфсизликка жиддий таҳдид солаётган Яқин Шарқдаги Фаластин-Исроил урушига яна бир бор алоҳида тўхталган. Бу ҳақда Президент матбуот хизмати хабар берди.

«Минг афсуски, бу қонли низо оқибатида аввало, тинч аҳоли вакиллари, айниқса, аёллар, болалар ва кексалар кўплаб қурбон бўлмоқда. Урушнинг минтақа бўйлаб ёйилиб кетиш хавфи тобора реал тус олмоқда», – деган президент.

Шунингдек, Ўзбекистон раҳбари мазкур можароларнинг кенг кўламли низога айланиб кетишига йўл қўйиб бўлмаслиги ҳақида таъкидлаб, томонларни зудлик билан ҳарбий ҳаракатларни тўхтатишга, тинч музокараларни бошлаш ва муросага келишга чақириш кераклигини қўшимча қилган.

«Фаластин халқи Бирлашган Миллатлар Ташкилоти резолюциялари билан тасдиқланган ҳуқуққа, яъни, ўзининг мустақил давлатини барпо этиш ҳуқуқига эга, деган қатъий позициямизни яна бир бор билдирамиз»,- деган Шавкат Мирзиёев.

Асрлар давомида Ўзбекистонга ён қўшни бўлган кўпмиллатли Афғонистон халқини бугунги мураккаб муаммолари қаршисида ёлғиз қолдириб бўлмаслиги, ушбу мамлакатни минтақавий интеграция жараёнларига фаол жалб этиш барқарор тараққиётнинг ажралмас ва зарурий шарти экани ҳам таъкидланган.

Президент йиғилганларни афғон халқига гуманитар ёрдам кўрсатишни кўпайтиришга, ушбу мамлакатдаги ўткир ижтимоий-иқтисодий муаммоларни жамоавий масъулият ва мақбул механизмлар асосида ҳал этишга чақирган.