Telegram реклама платформасидан мансабдор шахслар ва давлат идораларининг каналларини чиқариб ташлашни бошлади. Бу ҳақда мессенжер асосчиси Павел Дуров Telegram каналидаги изоҳларда маълум қилди.

Унинг сўзларига кўра, мансабдор шахслар ва давлат идораларининг каналлари реклама платформаларида вақтинча бўлган. 

«Ҳозирда мансабдор шахслар ва давлат идораларининг каналларини реклама платформасидан чиқариб ташлаяпмиз», — дея таъкидлаган Дуров.

Маълумот ўрнида, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов Telegram’да ишга тушган реклама фунциясига муносабат билдирганди.

Унинг сўзларига кўра, Telegram мессенжери тартибига кўра, эндиликда улар таҳририят ёки блогер рухсатисиз, хоҳлаган каналига реклама қўйиши мумкин.

«Бундан келиб чиқадики, сиз эшакдек ишлаб, канални кўтарасиз, унинг обрўси учун хавф-хатарга қарамай ёзасиз, сизнинг каналингизни ҳамма ўқишни бошлаганида Telegram тайёрга айёр бўлиб, сиздан сўрамай ўз рекламасини сизнинг каналингизга қўйиб, пул ишлайди. Сизга эса фигушки. Яна нимамуш, ‘Реклама кўришни истамайсанми? Тўла! Реклама сенинг каналингда чиқишини хоҳламайсанми? Тўла!’ Яқинда Ўзбекистон Президенти каналида ёки ҳуқуқ-тартибот органлари каналида ҳам реклама чиқиши ғалати кўринди», — дея ёзган у.

Аввалроқ  Telegram яна янги функцияларни ишга туширгани ва Twitter’да ҳам янги функция пайдо бўлгани маълум қилинган.