Тошкент вилоятида корхона 1,1 млрд сўмлик табиий газдан ноқонуний фойдалангани маълум бўлди. Бу ҳақда Бош прокуратура ҳузуридаги департамент хабар берди. 

Қайд этилишича, департаментнинг Ўртачирчиқ туман бўлими томонидан «Ўртачирчиқтумангаз» таъминоти бўлими ходимлари билан ҳамкорликда терговга қадар текширув ўтказилган. Унда «R.T.» МЧЖга қарашли пахта тозалаш корхонаси бош энергетиги А.Қ. ва бошқалар пахта тозалаш корхонасида газ тармоғига ўзбошимчалик билан тижорат мақсадида уланиб, давлат ва жамият манфаатларига 1,1 миллиард сўм зарар етказгани аниқланган.

Мазкур ҳолат юзасидан Жиноят кодексининг 169-моддаси (ўғрилик) билан жиноят иши қўзғатилиб, тергов ҳаракатлари ўтказилмоқда.