Тошкентда икки талаба «Олмазор» метро бекати ёнида «Yandex Taxi» иловаси орқали такси буюртма бериб, ҳайдовчини пичоқлади. Бу ҳақда Бош прокуратура Bugun.uz’га хабар берди.

Маълум қилинишича, 27 апрелдан 28 апрелга ўтар кечаси соат 23:30 ларда М.З. ва М.Д. қасддан одам ўлдириш ва ўзганинг мулкини эгаллаш мақсадида ошхона пичоғи билан қуролланиб, такси буюртма берган. Чақирувга асосан етиб келган А.Ч.нинг бошқарувида бўлган «Jentra»га ўтирган. Улар олдиндан тузилган режага мувофиқ уни Тошкент-Термиз автомобил йўли орқали Янгийўл тумани ҳудудига йўналтирган. Тахминан соат 01:00 ларда «Чаманзор» маҳалласида токзор ичига киргач, автомашинани тўхтатган.

Орқа ўриндиқда ўтирган Д.М. олдиндан тайёрлаб қўйилган ошхона пичоғи билан ҳайдовчининг бўйнига бир маротаба уриб, бўғаётган вақтида ҳайдовчи қаршилик қилган. Шундан сўнг, олд ўриндиқда ўтирган З.М. жабрланувчини қўлларини ушлаб турган вақтида туман ИИБнинг тунги навбатчилик гуруҳи аъзолари томонидан аниқланган. Жиноятчилар қўлга олинганлиги сабабли, бошланган жиноятни ўзларига боғлиқ бўлмаган ҳолатларга кўра охирига етказа олишмаган.

Янгийўл туман тиббиёт бирлашмасининг 28 апрелдаги тиббий маълумотномасига асосан, фуқаро Ч.А.нинг бўйин ўнг томон соҳасида уриб, санчилган жароҳатлар аниқланганлиги маълум қилинан.

Ҳодиса жойидан бир дона ошхона пичоғи ва қон доғлари ашёвий далил сифатида процессуал тартибда ҳужжатлаштириб олинган.