UzAuto Motors расмий саҳифаларидан маълум бўлишича, компания шартнома бериш жараёнини тўлиқ онлайн тарзда амалга оширишни режалаштирган.

Компанияга кўра, август ойидан бошлаб UzAuto Motors автомобиллар учун навбатни камайтиришга қаратилган қатор чора-тадбирларни қабул қилиши ишлаб чиқариш ҳажмини ошириш, шунингдек, автомобилларни ишлаб чиқариш жадвали асосида сотиш навбатларини уч баробарга, кутиш муддатини эса ўртача 1-3 ойга қисқартириш имконини берган.

Бироқ, кутиш муддатлари билан боғлиқ муаммоларни бартараф этиш бўйича қилинган ишлар, дилерлик марказларида оммавий автомобиллар учун шартномаларни олишдаги кескинликни камайтирмаган. Бу эса истеъмолчилар норозилигининг келиб чиқишига сабаб бўлмоқда.

«Бундан аввалги контрактацияда, дастурий таъминотда юқори юкланиш туфайли юзага келган техник носозликлар уни сезиларли даражада янгилаш зарурлигини кўрсатди. Шу муносабат билан, UzAuto Motors Ахборот ва коммуникациялар вазирлиги билан ҳамкорликда UzAutoSavdo тизимини модернизация ишлари амалга оширилиб, тизимнинг техник жиҳозланишини кучайтириш бўйича самарали ишлар қилинмоқда» дейилади компания хабарида.

Шунингдек, модернизация доирасида онлайн-савдо тизимида техник ишлар олиб борилаётгани боис, бугун 1 декабр  куни соат 08:00 дан 24:00 гача UzAutoSavdo тизими вақтинча ишламаслиги айтилган.

Бундан ташқари, онлайн савдога тўлиқ ўтиш вақти компаниянинг расмий каналларида қўшимча равишда эълон қилиниши айтилган.

Аввалроқ, Ўзбекистонда машиналар сотуви кескин ошгани ҳақда хабар берилганди. Бундан ташқари, UzAuto Motors автосалонларидан бири эшигини ичкаридан ёпиб, бир кишига ўнталаб шартнома бераётгани бўйича хабарлар тарқалганди.