Ижтимоий тармоқларда Chevrolet автомобиллари учун шартнома тузиш билан боғлиқ бир нечта хабарлар тарқалди. UzAuto Motors компанияси ушбу суратлар юзасидан расмий маълумот берди.

Унда айтилишича, қатор ижтимоий саҳифаларга тарқалган Д.К. исмли харидор томонидан камида 10 та машина учун шартнома тузилган автомобиллар рўйхати акс этган сурат ҳақиқатга тўғри келмайди. Яъни, шу йилнинг 3 ноябр куни суратда исми келтирилган фуқаро билан Chevrolet автомобилини сотиб олиш бўйича ҳеч қандай шартнома тузилмаган. Ўша куни шартномалар Chevrolet Lacetti’нинг фақат L-Style AT Plus модели учун мавжуд бўлган.


Бундан ташқари, компания аҳоли ўртасида автомобил учун шартномалар тузиш билан боғлиқ шов-шувларни кўтаришга уриниш ҳолатлари кузатилгани, уларнинг гўёки дилерлик маркази ходимлари ёпиқ эшиклар ортидан автомобил сотиб олиш бўйича 50 та шартнома тузганлиги акс этган баъзи видеотасвирларни тарқатишганини таъкидлаган. Компанияга кўра, бу ҳолатлар анча олдин содир этилган ва ўша дилерлик маркази салонининг раҳбарига интизомий жазо қўлланган.

UzAuto Motors раҳбарияти аҳолидан Chevrolet автомобиллари учун контрактация бошланганлиги ҳақидаги маълумотларни фақат расмий манбалардан олишни сўраган.

Эслатиб ўтамиз, аввалроқ компания Damas, Labo, Cobalt ва Captiva 5 сотуви бошланганини эълон қилганди. Бундан ташқари, UzAuto Motors сотувда йўқ автомобиллар нархини оширганди.