Ўзбекистон 2023 йилда ўрикнинг рекорд ҳосилини йиғиб олиши мумкин. Бу ҳақда Fruchtportal таҳлилий платформа маълумотларига таяниб «Дунё» АА хабар бермоқда.  Бу эса, ўз навбатида, ўрик экспорти ҳажмининг ўсишига ва мамлакатнинг ушбу кўрсаткич бўйича жаҳон етакчилари сафига қайтишига ёрдам беради.

Ҳозирги кунда Ўзбекистонда ўрик нархи тарихий энг паст даражада бўлиб, бундай кўрсаткич коронавирус пандемияси сабаб экспорт вақтинча тўхтатилган 2020 йилда қайд этилган. Мавсумнинг дастлабки икки ойида Ўзбекистон ўрик экспорти бўйича рекордни такрорлашга муваффақ бўлиб, 40 минг тоннага яқин маҳсулотни ташқи бозорларда сотган. Бу ўтган йилнинг шу даврига нисбатан 5,4 бараварга кўп.

Ўзбекистон мавсум давомида камида 65-70 минг тонна ўрикни ташқи бозорларга сотиши мумкинлиги тахмин қилинмоқда. Маълум шароитларда экспорт ҳажми ҳатто 75 минг тоннадан ошиши ҳам мумкин. Ўзбекистоннинг мавсум якуни бўйича жаҳон бозорида янги ўрик экспорти рейтингида иккинчи ўринни эгаллаши, 2023 йилда Италия ва Испанияда ўрик ҳосили кутилганидан анча кам ва охирги йилларда ўртача кўрсаткичдан паст экани билан боғлиқ.

Ўзбекистонда ўрик мўл ҳосиллигини инобатга олган ҳолда мамлакат қуритилган ўрик мевалари ишлаб чиқаришни кўпайтириши ва мавсум давомида ушбу бозорга ҳам босим ўтказиши мумкин.