Президент Шавкат Мирзиёев томонидан 2024 йилнинг 4 январ куни «Чиқиндиларни бошқариш тизимини такомиллаштириш ва уларнинг экологик вазиятга салбий таъсирини камайтириш бўйича чора-тадбирлар тўғрисида»ги 5-сонли ПФ имзоланди. Фармоннинг тўртинчи бандида қаттиқ маиший чиқиндилар бўйича кўрсатилган хизматлардан қарздор фуқаролар электр энергияси учун ҳам тўловларни амалга ошириб билмаслиги белгилаб қўйилган. Унга кўра,

• 2024 йилнинг 1 июнидан бошлаб Тошкент ва Нукус шаҳарлари ҳамда вилоятлар марказларида чиқинди хизматлари бўйича олти ой давомида шаклланган қарздорлик учун;
• 2024 йилнинг 1 ноябридан республиканинг барча ҳудудида чиқинди хизматлари бўйича уч ой давомида шаклланган қарздорлик учун;
• 2025 йилнинг 1 январидан эътиборан республиканинг барча ҳудудида чиқинди хизматлари бўйича бир ойлик қарздорлик учун электр энергиясига тўловни амалга оширишда чекловлар ўрнатилади.

Аввалроқ, Тошкент шаҳрида чиқинди учун тўловлар кескин оширилиши ҳақда хабар берилганди. Шунингдек, Бухоро, Наманган вилоятлари ва Тошкент шаҳрида қаттиқ маиший чиқиндилар хизматига ягона тўловлар белгиланганди.