Украина президенти Владимир Зеленский 21 декабрь куни АҚШга боради ва Капитойлига ташриф буюради, деб хабар беради Punchbowl News нашри. Бу Украина етакчисининг қуролли можаро бошланганидан бери биринчи хориж сафарига айланиши мумкин.

Нашр Зеленскийнинг сафари тафсилотлари тўғрисида ҳеч нарса эълон қилмаган. 2021 йилда Politico’нинг собиқ журналистлари томонидан асос солинган нашр АҚШ Конгресси фаолиятини ёритишга ихтисослашган.

Кейинроқ Axios нашри Америка парламенти шу ҳафта давомида амалга ошиши кутилаётган Владимир Зеленскийнинг ташрифига тайёргарлик кўраётганини ёзди. Маълумотларга кўра, Зеленский Конгресснинг иккала палатаси қўшма йиғилишида чиқиш қилиши керак.

CNN’нинг ўз манбаларига таяниб маълум қилишича, АҚШ президенти Жо Байден 21 декабрь куни Оқ уйда Владимир Зеленскийни қабул қилади, ҳозирда Украина президенти Вашинтонга учиб кетган.

Владимир Зеленский 24 февралдан бери Украина ҳудудини тарк этмаган, 16 март куни видеоалоқа орқали америкалик конгрессменлар қаршисида чиқиш қилган.

Аввалроқ The Time журнали Владимир Зеленскийни «Йил одами» деб эълон қилгани, Зеленский Учинчи жаҳон урушини бошлашга уринишда айблангани, Зеленский урушни тўхтатишнинг 10 та шартини маълум қилгани тўғрисида хабар берилганди.