АҚШ президенти Жо Байден Конгрессдан Украина, Исроил ва Тайванга 100 миллиард доллар ажратишни сўрашни режалаштирмоқда. Бу ҳақда CNN хабар берди.

Қайд этилишича, Байден Украинага 60 миллиард, Исроилга 10 миллиард доллар ажратишни сўрамоқчи. У бу бўйича эртага, 20 октябр куни Конгрессга қўшимча сўров юборишни режалаштиряпти.

Сенатнинг Ташқи алоқалар қўмитаси аъзоси, республикачи Жим Риш Байден Сенатдан 100 миллиард доллар сўрамоқчи эканини фақат янгиликлардан эшитганини айтган.

Кил университети маълумотларига кўра, уруш бошланганидан бери АҚШ Украинага умумий қиймати 75 миллиард доллар миқдорида ҳарбий ёрдам кўрсатган. Аммо сўнгги вақтларда АҚШ Конгрессида Украинага ёрдам кўрсатиш бўйича фикрлар бўлиниши юз бермоқда. Шу сабабли ҳам Украинага ҳарбий ёрдам пакетини ўз ичига олган йиллик бюджет ҳали ҳам тасдиқланмаган.