Дунё мамлакатлари ҳарбий кучларининг сони, уларнинг молиявий аҳволидан тортиб, логистика имкониятлари, географик омилларигача баҳолайдиган Global Firepower-2024 рейтинги эълон қилинди. Ушбу якунларини ҳисоблашда 60 дан ортиқ факторлар инобатга олинган.

Рейтингнинг кўрсаткичлари жадвалда яшил, кулранг ва қизил рангдаги стрелкалар билан белгиланган. Улар мамлакатлар ҳарбий салоҳиятининг рейтингда юқорилагани, барқарор ҳолатини сақлаб қолгани ёки пастлаганини кўрсатади.

Global Firepower’нинг кучли ўнталик мамлакатларига АҚШ, Россия, Хитой, Ҳиндистон, Жанубий Корея, Буюк Британия, Япония, Туркия, Покистон, Италия кирган.

Энг охирги ўринларда эса Сомали, Бутан сингари давлатлар қайд этилган.

Ҳозирда ҳарбий ҳаракатларни бошидан ўтказаётган Украинанинг ҳарбий ҳолати анча пастлаган. Россия эса ўз стабиллигини сақлашда давом этмоқда.

Рейтинг рўйхатида 58-ўрин билан Марказий Осиё мамлакатлари ичида Қозоғистон илк бор биринчи ўринни эгаллаган. Мамлакатнинг ҳарбий соҳасида 2023 йилдаги рейтингга қараганда ўсиш кузатилган.

Қозоғистондан олтита ўрин пастда Ўзбекистон келтирилган. Республиканинг рейтинги эса ўтган даврга нисбатан тушган.

Туркманистон 83-ўринни қайд этган ва ўз барқарорлигини сақлаб қолган. Қирғизистон умумий рейтингда 100 таликни якунлаб берган. Тожикистон эса 107-ўринни эгаллаган.