Green card чиққанидан сўнг омади юришмаганлар хафа бўлиб турган бир пайтда, ютганлар навбатдаги қадам қандай бўлиши ва уларни нималар кутаётгани ҳақида ўйлашни бошлайди. «Green card чиқди», деган хабар Америкага кетишингизни юз фоиз ҳал қилмайди. Олдинда сизни узун ва машаққатли йўл кутиб турибди.

Дастлабки босқичда, амалга ошириладиган кейинги ишлар тавсифи ва штрих-кодли хат Green card ютиб олганингизни англатади. Кейинги қадам керакли ҳужжатларни йиғиш босқичи ҳисобланади. Шуни унутмаслигимиз керакки, ариза топшириш ва виза олиш учун ажратилган вақт оз, шунинг учун жўнаб кетишга тайёргарлик қанчалик тез бошланса, АҚШ элчихонасига суҳбатга ўз вақтида бориш ва визани олиш имконияти шунчалик юқори бўлади.

Green card ютиб олгандан кейинги қадамлар

Аввало, иммигратцион виза шакли бўлган ДС–260 ариза веб саҳифани тўлдириш керак. Бу шаклда сиз Америкага борганингиздан кейин мўлжалланган яшаш жойингиз манзилини кўрсатишингиз керак. Унда берилган барча маълумотлар Америкадаги белгиланган турар-жой манзил билан бир хил бўлиши керак. Акс ҳолда, сизга Қўшма Штатларга кириш тақиқланиши мумкин. Унутманг, ариза ҳар бир оила аъзоси учун алоҳида тўлдирилиши керак. Жараённи тугаллагач, тасдиқлаш саҳифасини чиқариб олинг, чунки кейинги босқичда уни суҳбатга олиб борасиз.

Кейинги қадам ҳужжатларни тайёрлашдир. Бунда сиз диплом/таълимни тасдиқловчи ҳужжат, судланмаганингиз ҳақида маълумот, молиявий таъминланганликни тасдиқловчи ҳужжатлар (банк ҳисоботлари, мулкни баҳолаш, молиявий қўллаб-қувватлаш кафили ва бошқалар), никоҳ ёки ажралиш тўғрисидаги гувоҳнома, меҳнат дафтарчаси ва бошқа ҳужжатларни ўз вақтида тайёрлаб қўйишингиз керак бўлади.

Тиббий кўрикдан ўтиш босқичи энг муҳим жараёнлардан бири ҳисобланади. Фақатгина Халқаро Миграция Ташкилоти (ХМТ) шифокорлари рухсати билангина тиббий кўрикдан ўтиш мумкин. Тестлардан ташқари, эмланганлик ҳақидаги рўйхатда бўлиш ҳам тиббий кўрикдан муваффақиятли ўтиш омили ҳисобланади. Шу сабабли, имкон қадар тезроқ бу ҳақда қайғуриш ва тайёргарлик кўриб қўйиш керак.

Комиссиядан ўтганингиздан сўнг, тиббий кўрик маълумотлари элчихонага юборилади. Уни фақат Консул чоп этиши мумкин. Айтиб ўтиш керакки, тиббий кўрик нархи 80 доллардан бошланиб, ёшига қараб 165 долларгача бўлади.

Шундан кейин, элчихонада суҳбат бўлиб ўтади. Суҳбат санаси
2-2,5 ой олдин эълон қилинади. Суҳбат учун сиз аввалроқ тайёрланган ҳужжатларнинг тўлиқ тўпламини олишингиз ва консуллик йиғимларини тўлашингиз лозим. Бу бугунги кунда 330 долларни ташкил этади. Суҳбатдан ўтганлар 10 йиллик Green card визаси учун 235 доллар тўлов қилиши лозим.

Green card визасини олиш учун ҳужжатларни тўплаш ва суҳбатга тайёргарлик кўриш – бу кўпроқ эътибор ва куч талаб қиладиган қийин жараёндир. Аммо, ушбу босқичдаги самарадорлик суҳбатдан муваффақиятли ўтиш ва Қўшма Штатларга кетиш имкониятини оширади.