Номаълум шахслар Crocus City Hall концерт залида ўт очди

Москва вилоятидаги Пикник гуруҳининг концерти бўлиб ўтаётган Crocus City Hall концерт залида 22 март куни номаълум шахслар ўт очди. Бинода портлаш содир бўлган ва ёнғин бошланган. Террорчилар автомат қуролдан ўт очиб, кейин, граната ёки ёндирувчи шашка улоқтирган, оқибатда ёнғин бошланган.

Концертга келган ва омон қолганлардан бири «Новая газета Европа» нашри билан суҳбатда отишма концерт бошланиши арафасида, иккинчи ва учинчи қўнғироқлар оралиғида рўй берганини маълум қилган. У фойеда автоматдан сидирғасига ўт очилганини эшитгани, шундан кейин қўриқчилар одамларни залдан саҳна орқали чиқара бошлаганини айтган. Отишма вақтида айрим томошабинлар ҳали палтоларини гардеробга топшираётганди.

Гувоҳлар «Москва 24» нашрига болохонада ўтиришгани ва отишма овозларини эшитишганини гапириб беришган. Улар иккинчи қаватдан туша бошлашганида аллақачон залда ҳам одамларни ота бошлашганини тушунишган. Бошқа гувоҳлар, ўқ овози келиши билан полга ётишгани, аммо барча юқорига чиқаётганини кўргач, улар ҳам кўтарила бошлаганини айтишган. Ёнғин оқибатида Crocus City Hall нинг юқори қаватлари бутунлай вайрон бўлган.

Теракт оқибатида камида 60 киши ҳалок бўлган

Тергов қўмитасининг сўнгги маълумотларига кўра, камида 60 киши ҳалок бўлган, бироқ департамент бу рақам ҳали ҳам ўсиши мумкинлигини таъкидлаган. Соғлиқни сақлаш вазири Михаил Мурашконинг айтишича, 115 киши касалхонага ётқизилган, улардан беш нафари болалар, 60 нафари катталар ва бир нафари боланинг аҳволи оғир. Теракт юзасидан жиноий иш очилган.

Теракт вақтида залда олти мингдан ортиқ киши бўлган бўлиши мумкин — «Крокус Сити Ҳолл» концерт зали 6200 томошабинни сиғдира олади, «Пикник» концерти учун чипталарнинг барчаси сотиб бўлинганди. ТАСС хабарига кўра, мусиқачиларнинг ўзи жароҳатланмаган.

Кейинроқ гуруҳ директори Юрий Чернишевский мусиқачилар жамоа аъзоларидан бири билан боғлана олмаётгани ҳақида хабар қилди. У бинони тарк этган-этмагани — номаълум.

Жавобгарликни ИШИД ўз зиммасига олган, аммо бу фейк бўлиши мумкин

Ушбу теракт учун жавобгарликни ИШИД ўз зиммасига олган, бу ҳақда CNN телеканали ва Reuters агентлиги террорчи гуруҳга алоқадор Amaq ахборот агентлигига таяниб хабар қилган.

Rybar телеграм-канали бу хабар фейк бўлиши мумкинлигини тахмин қилиб, гуруҳ ёки унинг минтақавий филиалларининг ресурсларида ҳеч қандай баёнот йўқлигини билдирган.

Америкалик мансабдорлар The New York Times билан суҳбатда террорчи гуруҳ баёноти ҳақиқийлигини айтишган. CBS News ҳам Amaq агентлиги баёнотига ҳавола бериб, АҚШда ИШИДнинг жавобгарликни ўз зиммасига олгани тўғрисидаги баёнотини тасдиқловчи разведка маълумотлари борлиги ва бу баёнотга шубҳа қилишга асос йўқлигини айтган аноним мулозимнинг сўзларини келтирган.

Омбудсман Татяна Москалкова ҳам отишмани теракт деб атаган. Москва мэри Сергей Собянин дам олиш кунлари Москва шаҳрида режалаштирилган барча спорт, маданият ва бошқа оммавий тадбирлар бекор қилинганини маълум қилди. Россиянинг бошқа ҳудудларида ҳам шанба ва якшанба кунларига мўлжалланган оммавий тадбирлар ҳам бирин-кетин бекор қилинмоқда. Москва области губернатори Андрей Воробев воқеа жойига бориб, оператив штаб ташкил этилганини маълум қилган.

Росавиация Москва аэропортларида хавфсизлик чоралари кучайтирилганини маълум қилди

Росавиация Москва аэропортларида хавфсизлик чоралари кучайтирилганини маълум қилди. Пойтахтдаги тўртта аэропорт йўловчилардан эртароқ келишни сўраган. Шунингдек, Россия темирйўлларида ҳам хавфсизлик чоралари кучайтирилган.

Uzbekistan Airways теракт сабаб йўловчиларга мурожаат билан чиқди

Uzbekistan Airways’нинг маълум қилишича, ҳозирда Москвада хавфсизлик чоралари кучайтирилган.

Uzbekistan Airways «Домодедово» ва «Внуково» халқаро аэропортларидан парвоз қиладиган йўловчиларни Москва аэропортларига белгиланган вақтдан олдинроқ келишларинисўрайди, — дейилади авиакомпания хабарида.

Дунё давлатлари «Крокус Сити Ҳолл»даги терактни қоралади

Евроиттифоқ «Крокус Сити Ҳолл»даги терактни қоралади. «Европа иттифоқи Москвадаги «Крокус Сити Ҳолл»да содир этилган теракт ҳақидаги хабарлардан карахт ҳолатига тушди. Евроиттифоқ тинч аҳолига қарши ҳар қандай ҳужумни қоралайди. Бизнинг хаёлларимиз — Россиянинг жабрланган фуқаролари билан», — деган ЕИнинг хорижий ишлар ва хавфсизлик сиёсати бўйича вакили Петер Стано.

Ўзбекистон Ташқи ишлар вазирлиги ҳам Москва шаҳридаги Crocus City Hall’да содир этилган терактни кескин қоралайди. Бу ҳақда вазирлик матбуот хизмати хабар берди.

«Терроризмни оқлаб бўлмайди, биз бегуноҳ фуқароларга нисбатан қилинган бундай зўравонликни бир овоздан рад этишга чақирамиз», — дейилади ТИВ хабарида.

Вазирлик ҳалок бўлганларнинг оила аъзолари ва яқинларига ҳамдардлик билдирди.

Шунингдек, Франция, Германия, Буюк Британия ва қатор мамлакатларда ҳам теракт қораланиб, ушбу давлатларнинг ташқи ишлар вазирликлари жабрланганларга ҳамдардлик билдирди. Оқ уй ҳам воқеа жойидан олинган кадрларни «қўрқинчли» деб атаб, қурбонлар ва жабрланганларнинг оилаларига ҳамдардлик билдирган.

АҚШ Москвада теракт эҳтимоли ҳақида огоҳлантирган

АҚШ 8 март арафасида Москвада теракт эҳтимоли ҳақида огоҳлантирган, ўз фуқароларига яқин 48 соат ичида одамлар тўпланган жойларга боришдан тийилишни тавсия этганди. Америка элчихонаси «экстремистлар шаҳарда одамлар кўп тўпланадиган жойларга, жумладан концертларга ҳужум қилишни режалаштираётгани» тўғрисидаги «хабарларни кузатиб бораётгани»ни маълум қилганди.

Суриштирувчи Христо Грозевнинг аниқлик киритишича, АҚШ элчихонаси Россия махсус хизматлари Афғонистондаги ИШИД билан алоқадор бўлган ИШИД-Хуросон гуруҳи теракт тайёрлаётгани ҳақида «аниқ далиллар» олгани ҳақида огоҳлантирган. Унинг сўзларига кўра, Россия томони америкаликлар томонидан тақдим этилган маълумот «етарлича аниқ эмас» деб жавоб қайтарган. Шундан кейин, Грозевнинг қайд этишича, Россияда барибир «ИШИД уяларининг айрим аъзолари» ҳибсга олинган. «Яъни ФХХ барибир кимларни ҳибсга олишни аниқлаб олди ва бу ишга киришди», — деган Грозев.

The New York Times манбалари март ойида АҚШ ИШИД-Хуросон бўлинмаси Москвага ҳужум қилишни режалаштиргани ҳақидаги разведка маълумотларини қўлга киритгани ҳақида айтишган. Америкалик расмийлардан бири ИШИД аъзолари «Россияда фаол ҳаракатланаётгани»ни айтган.

Отишмадан кейин Оқ уйдагилар теракт тайёрлангани тўғрисида маълумотга эга бўлишмаганини маълум қилди.

Украинадагилар терактга алоқадорлик тўғрисидаги айбловларни рад этишмоқда

Украинадагилар терактга алоқадорлик тўғрисидаги айбловларни рад этишмоқда. Украина президенти офиси маслаҳатчиси Михайло Подоляк Украина «Крокус Сити Ҳолл»даги ҳодисага «ҳеч қандай алоқаси йўқлиги аниқлиги»ни маълум қилди.

Украина бош разведка бошқармаси терактни «Россия махсус хизматларининг Путиннинг топшириғи билан режалаштирилган ва қасддан уюштирилган провокацияси» деб баҳолади. «Унинг мақсади — Украина бўйлаб янада қаттиқроқ зарбалар йўллаш ҳамда Россияда тўлиқ сафарбарликни оқлаш», — дейилади бошқарма баёнотида.

Украина томонида туриб жанг қилаётган «Россия кўнгиллилар корпуси» ҳам терактга алоқадорлигини рад этган. «Россияга озодлик» легиони ҳодисада «Путиннинг террорчи режими»ни айблаган. «Биз Кремл диктатурасининг бу каби кўринишларига Путин ҳокимиятга келган илк кунлардаёқ гувоҳ бўлганмиз ва навбатдаги қонли провокация ҳайратланарли эмас. Теракт тайёрланган. Унинг медиада қандай ёритилиши ҳам», — дейилади легион баёнотида.

Шавкат Мирзиёев Путинга таъзия йўллади

Шавкат Мирзиёев Россиянинг Москва вилоятидаги Crocus City Hall концерт залида содир бўлган фожиа оқибатида ўнлаб бегуноҳ инсонлар қурбон бўлгани ва жиддий жароҳат олгани муносабати билан президент Владимир Путинга чуқур таъзия йўллади. Бу ҳақда Президент матбуот хизмати хабар берди.

Мактубда Ўзбекистон тинч аҳолига қарши қаратилган бу террорчилик ҳаракатини қатъий қоралаши ҳамда мазкур жиноят ташкилотчилари ва ижрочиларига жазо муқаррарлиги таъминланишига ишонч билдирилган.

Давлат раҳбари вафот этганларнинг яқинларига бардамлик, барча жароҳат олганлар тез фурсатда соғайиб кетишини тилади.