Bugun.uz манбасига кўра, Kompromatuzb Телеграм-канали собиқ администратори Хуршид Далиев Тошкент вилояти Бўстонлиқ туманида жойлашган «Товоқсой» номи билан танилган №64/3 сонли ахлоқ тузатиш колониясига жўнатилган.

Хуршид Далиев 2023 йилнинг 26 сентябр куни ўтказилган суд мажлисида қатор моддалар билан айбдор деб топилиб, унга нисбатан 7 йил муддатга озодликдан маҳрум қилиш жазоси тайинланган.

Шу йилнинг январ ойи охирларида фуқаро И.А. келиб тушган мурожаатга асосан, Human.uz сайтининг директори Хуршид Далиев ва бошқа шахсларнинг телеграм мессенжеридаги Kompromatuzb ва бошқа каналлар орқали амалга оширилган жиноятларга алоқадорликлари сабабли уларга нисбатан Жиноят кодексининг 165-моддаси 2-қисми «в» банди билан жиноят иши қўзғатилганди.

Маълумот учун, ушбу моддага кўра товламачилик бир гуруҳ шахслар томонидан олдиндан тил бириктириб содир этилган бўлса, жиноятни амалга оширганлар беш йилдан ўн йилгача озодликдан маҳрум қилиш билан жазоланади.

Аввалроқ, Human.uz нашри раҳбарияти «орган ходимлари» томонидан қўлга олиниши юзасидан қўшимча маълумот берилганди. ДХХ эса нашрнинг раҳбарияти билан боғлиқ иш юзасидан қўшимча маълумот берганди.