Йўл-транспорт ҳодисаси оқибатида Наманган муҳандислик-қурилиш институтининг талабаси вафот этди. Бу ҳақда вилоят ИИБ ахборот хизмати хабар берди.

Маълум қилинишича, 20 апрел куни соат 18:40 ларда Янги Наманган туманида яшовчи, тумандаги мактабнинг 11-синф ўқувчи 17 ёшли йигит тоғасининг Lacetti’сида ҳаракатланганда бошқарувни йўқотган ва йўлнинг қарама-қарши қисмига ўтиб кетган.

Ҳаракат хавфсизлигини таъминлай олмаган йигит йўлнинг чап томонида турган, Хоразм вилояти Боғот туманида яшовчи, Наманган муҳандислик-қурилиш институтининг тўрт нафар талабасини уриб юборган.

«Машина биздан узоқроқда ҳаракатланаётган эди. Биз уни тўғри ўтиб кетади деб ўйлаган эдик. Биз қараб тургандик, келиб, тротуарга чиқиб, бизни уриб кетди. Қочишга улгурмадик. Машина (марҳум – тахр.) дўстимнинг орқа тарафидан урган. У тепамдан учиб ўтиб, устунга урилди», дейди жабрланувчи.

Жабрланувчилардан бири шифохонада вафот этган, уч нафари эса енгил жароҳат олган.

Йигитнинг онаси фарзанди машина ҳайдашидан хабари йўқлигини билдириб, урз сўраган. Видеокамералардаги ёзувларга кўра, ўқувчи мунтазам автомобил бошқариши аниқланган.