Археологлар Перуда ёши 800 йилдан ортиқ бўлган мумиёни аниқлади. Бу ҳақда «The Jerusalem Post» хабар берди.

Маълум қилинишича, топилма Перунинг марказий қирғоғида Лима шаҳри чеккасидаги ерости иншооти ичидан аниқланган. Мумиёланган қолдиқлар Жанубий Америка мамлакатининг қирғоғи ва тоғлари ўртасида ривожланган маданиятга мансуб одамга тегишли экани қайд этилган.

Сан-Маркос давлат университети археологи Питер Ван Дален Лун ҳали мумиёнинг жинсини ўрнатиш имкони йўқлигини айтган. Унинг танаси бутунлай арқон билан қопланган ва қўллари юзини ёпган ҳолда топилган. Бу маҳаллий дафн маросимининг бир қисми бўлиши кераклиги қайд этилган.

Таъкидланишича, мумиё ёнида сопол буюмлар, ўсимлик қолдиқлари ва тош асбоблар ҳам бўлган.

Аввалроқ Мисрдаги ибодатхоналардан бири остида сирли қабр топилгани ва археологлар Перуда оммавий қабрларни аниқлагани хабар берилган.