Хориж манбаларининг хабар беришича, Россия президенти Владимир Путин мамлакатда яқинлашиб келаётган президентлик сайловларида иштирок этишини маълум қилди. Бу орқали у бешинчи президентлик муддатига ўз номзодини қўяди.

Унга кўра, шу йилнинг 6 декабр куни Россиянинг Федерация Кенгаши президентлик сайловини 2024 йилнинг 17 март санасига белгилади. Ушбу сайлов жараёнлари уч кун давомида — 15-16-17 март кунлари бўлиб ўтади. Амалдаги давлат раҳбари Владимир Путин эса тўрт марта — 2000, 2004, 2012 ва 2018 йилларда Россия президенти лавозимига сайланган. Мамлакат Конституциясига киритилган ўзгартиришлар қабул қилингандан сўнг, у 2024 йилги сайловда ўз номзодини кўрсатиш ҳуқуқини олди.

Маълумот учун, 1999 йилнинг сўнгги кунида Россия Федерациясининг биринчи президенти Борис Елцин томонидан президентлик лавозимини қабул қилиб олган 71 ёшли Путин СССР раҳбари Иосиф Сталин давридан бери бошқа Россия ҳукмдорларидан фарқли ўлароқ, кўпроқ вақт давомида президент бўлиб ишлади ва ҳатто Собиқ Иттифоқнинг бошқа бир раҳбари Леонид Брежневнинг 18 йиллик бошқарувини ҳам ортда қолдирди.

Аввалроқ, Путин президентликка сайланса, бу унга 2030 йилгача ҳокимиятда қолишга имкон бериши ҳақда хабар берилганди.