Қирғизистон Республикаси шаҳарларида давлат крематорийларини қуриш режалаштирилмоқда. Бу ҳақда «Спутник Қирғизистон» хабар берди.

Жогорку Кенеш депутати Марлен Маматалиевга кўра, крематорийлар ҳақидаги банд яқинда қабул қилинган «Дафн этиш ва дафн этиш билан боғлиқ иш тўғрисида»ги қонунда бор (Маматалиев қонун лойиҳаси ташаббускорларидан бири).

«Ўлимдан кейин одамни куйдириш керак, деган фикрда бўлганлар бор. Янги қонунда крематориялар қуриш назарда тутилган. Улар нафақат инсон танасини, балки айрим касалликларга чалинган ўлик ҳайвонларни ҳам ёқиб юборишади», — деди депутат.

Унинг сўзларига кўра, крематориялар давлат ҳисобидан ва фақат шаҳарларда қурилади, аммо аниқ сони ҳозирча номаълум.

«Олти ой муддатда қўшимча меъёрий-ҳуқуқий ҳужжатлар қабул қилинади. Одамни куйдириш тартиби муайян текширувдан ўтади. Крематориялар иши давлат органлари томонидан назорат қилинади», — деди Маматалиев.