Қозоғистонда номаълум касаллик сабаб қорамоллар нобуд бўлди. Бу ҳақда «1tv» хабар берди.

Маълум бўлишича, Мортик қишлоғида ўтган ойда бирданига 16 та бузоқ ўлган. Ҳайвонлар дарҳол ёқиб юборилгани сабабли уларнинг нимадан ўлганини аниқлашнинг иложи бўлмаган. Ветеринария шифокорлари таҳлил қилиш учун қон олишга улгурмаган, аммо аломатларини ўрганиб чиқиб, бузоқларнинг ўлимига бу ҳудудларда узоқ вақт бўлмаган «эмфизематик карбункул» инфекцияси сабаб бўлган деб тахмин қилинган.

Таъкидланишича, инфекция биринчи навбатда вояга етмаган ёш ҳайвонларга таъсир қилади. Бунинг устига, уларни ёши туфайли ҳали эмлаш ҳам мумкин эмас. Шунингдек, ветеринарлар ёзги жазирама вазиятни янада оғирлаштириши мумкинлигини маълум қилган. Акмола вилоятида ҳам чорва моллари нобуд бўлаётгани хабар қилинган. Мазкур вилоятнинг Азат ва Қорабулоқ қишлоқларида беш юздан ортиқ қорамол касал бўлиб, ўнга яқини нобуд бўлган.

Айтилишича, касаллик тарқалишига иссиқлик сабаб бўлган. Ҳаддан ташқари қуриб кетган пичан сигирларнинг оғиз бўшлиғига шикаст етказади ва натижада стоматитни келтириб чиқаради. Бу ҳайвонлар учун жуда ёқимсиз, жиддий ва баъзида ҳалокатли касалликдир.

Аввалроқ АҚШда қушларни нобуд қиладиган номаълум касаллик тарқалгани айтилганди. Шунингдек, Қозоғистонда номаълум касаллик оқибатида уй ҳайвонлари ҳалок бўлаётгани хабар қилинган.