Украина президенти Владимир Зеленский ўзининг Telegram каналида 2014 йил Симферополдаги Қрим парламенти биноси қаршисида ўтказилган митингга бағишлаб пост қолдирди. Ўшанда намойишчилар Қримнинг Украина таркибидан чиқишига қарши норозилик билдирган эди.

«Бундан тўққиз йил олдин Қримда Россия босқини бошланди. Қримни қайтариш орқали биз тинчликни тиклаймиз. Бу бизнинг еримиз. Бизнинг одамларимиз. Бизнинг тарихимиз. Биз Украинанинг ҳар бир бурчагига мамлакатимиз байроғини қайтарамиз. Qirim serbest olacaq!», — дейилади хабарда.

Қрим 2014 йилда референдум натижалари бўйича Россия таркибига қўшилганди. Украина ҳукумати ва Ғарб давлатлари ушбу овоз бериш жараёнларини тан олмаган ва содир бўлаган воқеани аннексия деб ҳисоблаган. Россия президенти Владимир Путин яриморол аҳолиси ўз танловини амалга оширган ва Қримнинг тарихан қаерга тегишли экани тўғрисидаги масала ёпилганини маълум қилганди.

Пентагоннинг ҳисоблашича, Украина армиясида ҳозирча Қримни қайтариб олиш имконияти йўқ. Идора вакиллари ҳарбийларнинг позицияси ҳақида конгрессменлар учун ўтказилган махфий брифингда маълум қилган.

Зеленский ҳукумати Украина ҳарбий йўл билан 1991 йилги чегараларни қайтариб олишига Пентагон шубҳага бораётганидан «дарғазаб бўлганди». Киевнинг таъкидлашича, Америка разведкаси Украина Қуролли Кучларининг имкониятлари борасида олдин ҳам хато қилган. АҚШ Штаб бошлиқлари бирлашган қўмитаси раиси генерал Марк Милли январь охирида шу каби баҳони берганди. У 2023 йилда Украина армиясига 1991 йилги чегараларга қайтиш «ҳарбий йўл билан жуда ва жуда қийин эканини» маълум қилган.