2–7 декабрь кунлари Парагвай пойтахтида ЮНЕСКОнинг Номоддий маданий меросни муҳофаза қилиш бўйича Ҳукуматлараро қўмитасининг 19-сессияси бўлиб ўтмоқда. 4 декабрь куни сессия доирасида Ўзбекистон ва Марказий Осиё давлатлари ташаббуси билан «Рубоб ясаш ва чалиш санъати» бир овоздан Репрезентатив рўйхатга киритилди.

Қўмита рубобни Марказий, Жанубий ва Жанубий-Ғарбий Осиё халқлари учун қадимий ва бирлаштирувчи чолғу асбоби сифатида тан олди. Рубоб нафақат маданий алмашинувни, балки гендер тенглиги, иқтисодий ва ижтимоий барқарор ривожланишни қўллаб-қувватлашда ҳам муҳим роль ўйнаши таъкидланди.

ЮНЕСКОнинг мазкур қарори рубоб санъатини миллий ва халқаро миқёсда асраб-авайлаш, тарғиб қилиш бўйича амалга оширилаётган чора-тадбирларни янада ривожлантириш учун замин яратади.

«Рубоб ясаш ва чалиш санъати» ЮНЕСКОнинг Инсоният номоддий маданий мероси рўйхатига Ўзбекистон ташаббуси билан киритилган 16-элемент бўлиб, мамлакатнинг маданий меросни халқаро даражада тарғиб қилишга қўшган яна бир ҳиссасидир.