Прокуратура органлари томонидан Маданий мерос агентлиги билан тарихий ёдгорликларни муҳофаза қилишга қаратилган тизимли назорат тадбирлари ўтказилган. Бу ҳақда Бош прокуратура матбуот хизмати хабар берди.

Текширишлар давомида Сурхондарё вилоятининг Шеробод туманида тўртта археология ёдгорлигига етти миллиард сўмлик зарар етказилгани аниқланган.

• Милоддан аввалги V–I асрларга оид «Таллаган тепа» ёдгорлигининг 40 м2 қисми кесиб олиниб, автомобил йўли ўтказилиши оқибатида 888 миллион сўмлик;
• V–VIII асрларга оид «Ғўринтепа» ёдгорлигининг 200 м2 қисми бузилиб, уй-жойлар қуриб юборилиши оқибатида 4,7 миллиард сўмлик;
• I–IV асрларга оид «Хушвақтепа» ёдгорлигининг 12 м2 қисми кесиб олиниб, ҳожатхона қурилганлиги оқибатида 266 миллион сўмлик;
• V–VII асрларга оид «Тоштепа» ёдгорлигининг 56 м2 тупроқлари кесиб олиниб, молхона қурилганлиги оқибатида 1,2 миллиард сўмлик зарар етказилган.

Аниқланган ҳолат юзасидан туман ҳокимлиги мансабдор шахслари ва бошқа шахсларга нисбатан жиноят иши қўзғатилган.

Ҳозирда мазкур ҳолат бўйича тергов ҳаракатлари олиб борилмоқда.

Эслатиб ўтамиз, аввалроқ, Ўзбекистондаги бешта ёдгорлик очиқ осмон остидаги музейга айланиши хабар қилинганди.