ВКонтакте ва Telegram асосчиси Павел Дуров мессенжер фойдаланувчилари билан шахсий саҳифасидаги суҳбатда нима учун Россияда фаолият олиб бормаётганини айтди. Бу ҳақда «Газета.ru» хабар берди.

Маълум қилинишича, фойдаланувчилар Дуров нима учун Россиядан узоқлашгани ва гўёки ўзини ватани билан боғламаслигини сўраган.

«Менинг Россиядан ташқаридаги карьерам ичкаридан кўра кенгроқ. Мен ВКонтакте’га нисбатан Telegram’ни узоқроқ бошқараман. Рус тилида камроқ мулоқотга киришаман», — деган Дуров ва Дубайдаги ҳаётини «ажойиб» деб таърифлаган.

Маълумот учун, Дуров мессенжер коронавирус ҳақидаги сохта хабарларни блокламаслиги, чунки цензура кўпинча нотўғри ғояларга қарши курашни мураккаблаштиришини айтганди. Шу билан бирга, 20 йиллик мунозара платформаларини бошқариш давомида ёлғон хабарлар модераторлар томонидан олиб ташланганида, улар аксинча кучайиб борганига гувоҳ бўлганини таъкидлаган.

«Сохта ғояларнинг тарқалишига чек қўйиш ўрнига, цензура кўпинча уларга қарши курашишни қийинлаштиради», — дея у ҳақиқатни тарқатиш ҳар доим цензурадан кўра самаралироқ стратегия бўлишини таъкидлаган.

Аввалроқ Telegram асосчиси Apple va Google’ни танқид қилгани ва Telegram асосчисининг фарзандлари Forbes’нинг энг бой меросхўрлар рейтингига киргани маълум қилинган.