Ўзбекистон бош вазири ўринбосари Жамшид Ходжаев бошчилик қилаётган савдо-иқтисодий делегация Кобулга ташриф буюрган. Бу ҳақда «Толибон» муваққат ҳукумати Саноат ва савдо вазирлиги матбуот хизмати хабар берди.

Ушбу ташрифдан мақсад ўзаро савдони ривожлантириш, икки давлат ўртасидаги транзит муаммоларига ечим топиш ва Кобулда Ўзбекистон товарлари кўргазмасини очишдан иборат эканлиги айтилган.

Делегацияни аэропортда «Толибон» савдо вазири Нуриддин Азизий кутиб олган.

Ўзбекистон президентининг Афғонистон бўйича махсус вакили Исматулла Иргашев, транспорт вазири Илҳом Маҳкамов, қишлоқ хўжалиги вазири Иброҳим Абдураҳмонов, энергетика вазири Жўрабек Мирзамаҳмудов ва бошқа амалдорлар делегация таркибида бор.

«Толибон» иқтисодиёт вазири ўринбосари Абдул Ғани Бародар Ўзбекистон делегацияси билан учрашувда Афғонистон юкларининг Ўзбекистон орқали ўтадиган транзит нархини пасайтиришни талаб қилган.

«Афғонистон Ўзбекистон йўлларидан Марказий Осиё мамлакатларига савдо ва транзит учун фойдаланади. Бу йўналишда афғон юкларини ташиш нархи бошқа йўналишларга қараганда юқори ва биз уни камайтирмоқчимиз», — деди у.

Эслатиб ўтамиз, аввалроқ, «Толибон» вакиллари Ўзбекистондан Қўштепа канали қурилишидан хавотирланмасликни сўрагани хабар қилинганди.