Тошкент шаҳрида ҳаракатланувчи автобуснинг ёнаётгани акс этган видеоёзув ижтимоий тармоқларда тарқалди.

Пойтахтнинг Мирзо Улуғбек тумани ҳокимлиги матбуот хизматининг расмий маълумот беришича, ҳодиса бугун, 20 декабр куни туманнинг Мирзо Улуғбек кўчаси Кимё институти биноси қаршисида ҳаракатланиб келаётган 5-сонли автобус саройига қарашли «Буюк Ипак йўли метро бекати-Чингелди» йўналишидаги 151-рақамли автобуснинг мотор қисмида ёнғин чиқиши натижасида содир бўлган. Оқибатда, транспорт воситасининг орқа ўриндиғи ёниб кетган.

Келтирилишича, автобус ичида йўловчилар бўлмаган. Ёнғин йўналиш якунланиб автобус саройига қайтаётган пайтда содир бўлган.

Ҳодиса тўғрисида Мирзо Улуғбек тумани ФВБга соат 20:38 да маълумот берилган ва ёнғин соат 20:47 да ўчирилган. Ёнғин оқибатида жабрланганлар йўқ. Ҳозирда ёнғин сабаби ва кўрилган моддий зарар миқдори аниқланмоқда.