Тошкентда мушуклар учун меҳмонхона қурилди
Ноодатий меҳмонхона жониворларга қишда иссиқ бошпана вазифасини бажариш учун кўнгиллилар томонидан ташкил этилган.
Тошкент шаҳар ҳокимлиги матбуот хизмати хабар беришича, пойтахтнинг Учтепа туманида жойлашган «Ватан» маҳалласида ноодатий кўринишда бўлган мушуклар учун меҳмонхона қурилган.
Ушбу маскан кўнгиллилар ташаббуси ва маҳалла аҳолисининг розилиги билан бунёд этилган.
«Меҳмонхона кўча мушуклари учун иссиққина бошпана вазифасини бажариб, яқинлашиб келаётган қиш кунларида жонига оро киради»,- дейилган хабарда.
Ушбу меҳмонхона «Мушуккент» лойиҳаси ва Тошкент шаҳар ИИББ ҳимоясида бўлиб, маҳаллада яшовчи болаларни меҳрли бўлишга ўргатиши кўзда тутилган.
Шунингдек, ҳокимият «Мушуккент» лойиҳаси ва «Ватан» маҳалласининг аҳолиси ҳамда кўнгилли фуқароларга жониворларга кўрсатаётган ғамхўрлиги учун миннатдорчилик билдирган.
