Тошкент шаҳар Мирзо Улуғбек туманида вояга етмаган қизга шилқимлик қилган эркакка ҳукм ўқилди. Бу ҳақда Тошкент шаҳар судлари ахборот хизмати Bugun.uz’га маълум қилди.

Қайд этилишича, 2024 йил 1 феврал куни 17 ёшли қиз дарсдан қайтаётганида нотаниш эркак унинг орқасидан ушлаган. Қиз эркакка қаршилик кўрсатгач, юзига мушт тушириб, воқеа жойидан яширинишган.

Судланувчи судда ўз айбларига иқрорлигини билдирган. У биринчи турмушидан ажрашиб, бўйдоқ юргани учун қиз билан танишмоқчи бўлган. Сўнг унга уйланиш мақсадида ортидан борган ва уятсиз ҳаракатлар қилганини айтган. Қиз қаршилик кўрсатгани учун жахли чиқиб, уни урганини билдирган. Шунингдек, эркак жабрланувчи ва унинг оила аъзоларидан кечирим сўраган ва қонуний енгиллик берилишини илтимос қилган.

Жабрланувчи эса бўлган воқеадан кейин ҳали ҳам ўзига кела олмаганини, кўчага бир ўзи чиқишга қўрқаётганини айтган. Шунингдек, у мактабга ёлғиз ўзи бора олмаётганини маълум қилган.

Иш бугун, 1 май куни жиноят ишлари бўйича Мирзо Улуғбек тумани судида кўриб чиқилди. 1997 йилда Тошкент шаҳрида туғилган шахсга нисбатан Жиноят кодексининг 277-моддаси (Безорилик) 2-қисми «г» банди билан 2 йил 6 ой муддатга озодликдан маҳрум қилиш жазоси тайинланди.

Тайинланган жазони манзил-колонияларда ўташ белгиланди.