Туркиянинг Денизли шаҳрида фоҳишаликка қарши рейд ўтказилди. Бу ҳақда мамлакатнинг Hurriyet нашри хабар бермоқда.

Унда айтилишича, олиб борилган рейд жараёнларида шаҳар ҳудудида бир нечта киши ҳибсга олинган. Фоҳишалик ишларига мажбурланган беш нафар Ўзбекистон фуқароси қутқариб олинган. Нашрнинг қўшимча қилишича, ўзбекистонликларни ушбу ишларга мажбурлаган туркиялик сутенёрлар — аёлларни фоҳишалик ишларига ундовчи ва мажбурловчилар ҳам қўлга олинган.

Мамлакат полициясининг аниқлашича, сутенёрлар ўзбек аёллари билан интернет орқали танишиб, уларни турли баҳоналар, яхши маошли иш топиб, турмуш қуриш ваъдалари билан Туркияга жалб қилишган.

Келтирилишича, суд беш сутенёрдан учтасини ҳибсга олиб, икки нафарини суд назорати остида қўйиб юборган. Қутқарилган аёлларнинг эса Ўзбекистонга қайтариб юборилиши айтилган.

Эслатиб ўтамиз, аввалроқ Хоразм ва Жиззахда Туркияга фоҳишаликка юбормоқчи бўлган аёллар ушланганди. Шунингдек, Ҳиндистонда фоҳишаликка мажбурланган аёллар қисмати ҳақда хабар берилиб, Bugun.uz Ҳиндистондан мурожаат йўллаган аёллар билан суҳбатлашганди.