Хорижий манбаларнинг ёзишича, Украина Қуролли кучлари бош қўмондони Валерий Залужнийнинг ёрдамчиси Гэннадий Частяков Киев вилоятининг Чайки қишлоғида граната портлаши оқибатида ҳалок бўлган. Қўмондоннинг ўзи ҳам ёрдамчисининг ўлимини тасдиқлаган.

«Бугун яқин дўстим, майор Геннадий Частяков ўзининг туғилган куни арафасида вафот этди. Унга берилган совғалардан биридаги номаълум портловчи қурилма ишга тушган. Геннадийнинг аёли ва тўрт нафар боласи бор. Оиласига чуқур ҳамдардлик билдираман» деган бош қўмондон Залужний.

Олиб борилган суриштирув пайтида, мамлакат ички ишлар вазирлиги вакили бу ҳолатни қўмондон ўринбосарининг қуролга эҳтиётсизлик билан муносабатда бўлиши туфайли содир бўлганини айтган. Яъни, полиция уйни текшириш мобайнида бешта бузилмаган граната топиб олган. Марҳумнинг аёли ҳуқуқ-тартибот идораларига эрининг қўлида портлаган граната у уйга олиб келган совға қутисида бўлганини айтган. Уни очиш вақтида эса портлаш содир бўлган.

Хабарда айтилишича, унинг ўғли ҳам юзидан жароҳат олган. Чунки, марҳум гранаталардан бирини олиб, ёнида турган ўғлига уни қандай ишга туширишни кўрсата бошлаган.

Ҳолат бўйича Украина Ички ишлар вазири Игор Клименко воқеа тафсилотларини маълум қилган. Вазирга кўра, шу йилнинг 6 ноябр куни туғилган кунини нишонлаш вақтида Частяков ҳамкасбларининг совғаларини олиб, уйига қайтган ва уларни қариндошларига кўрсата бошлаган.

«Частяков ичида гранаталар солинган совға қутисини чиқариб, ўқ-дорилардан бирини ўғлига намойиш этган. Бу Ғарб услубидаги янги гранаталар эди. Аввал ўғли қўлига қуролни олиб, унинг ҳалқасини бурай бошлаган. Шундан сўнг, аскар боланинг қўлидан гранатани олиб, ҳалқани тортиб юборган ва оқибатда фожиа содир бўлган» дея изоҳ берилган вазирлик маълумотномасида.

Эслатиб ўтамиз, аввалроқ Украина Кремлга қарши россиялик фуқаролардан иборат баталон тузганди. Бундан ташқари, Украина қўшинлари Андреевкани эгаллагани ҳақида хабар берилганди.