Бугун, 15 сентябр куни Шарқий Украина ҳудудида кураш олиб бораётган Украина ҳарбий кучлари Бахмут жанубида жойлашган Андреевка ҳудудини эгаллаб олди. Ҳозирда ҳудудда Украина байроғи кўтарилган. Бу ҳақда Украина ҳарбий штаби тарқатган маълумотларга асосланиб, CNN нашри хабар берди.

Андреевка учун кураш олиб борган ҳарбий қисм вакиллари берган маълумотларга кўра, Андреевкада турган рус ҳарбий қисмлари ўраб олинган ва тўлалигича қириб ташланган.

«Бу расмий хабар. Учинчи махсус ҳужум бригадаси Андреевкани озод қилди. Россия Федерациясининг 72-мотоўқотар бригадаси парча-парча қилинди. Яшин тезлигида ўтказилган операция натижасида Россиянинг Андреевка гарнизони ўраб олинди, асосий кучлардан узиб қўйилди ва йўқ қилинди», — дейилади ҳарбий қисм раҳбарияти берган баёнотда.

Ҳарбий қисмдагилар эгаллаган позицияларини мустаҳкамлашни давом эттираётгани маълум қилинган. Украина ҳарбий маъмурияти вакиллари фикрича, Андреервканинг эгалланиши Бахмутга томон олиб бориладиган ҳаракатларда муҳим таянч ва бутун уруш тақдирини ҳал қилувчи калитдир.

Ўз навбатида, Андреевканинг эгалланиши Украина учун устунликка эришиш имконини беради. Чунки, бу ҳудуд Вагнер аскарлари Бахмутни тарк этганидан кейинги илк йирик ғалабадир.

Украина Қуролли Кучлари Бош штаби ўзининг Facebook’даги саҳифасида ҳужум амалиётлари чоғида Донецк вилоятининг Андреевка шаҳри қўлга киритилгани, душманнинг ишчи кучи ва техникасига катта таъсир кўрсатилиб, эгалланган ҳужум чизиқларида мустаҳкам ўрнашиб олинганини маълум қилган. Россия вакиллари эса Украина эгаллаганини даъво қилаётган ҳудудларда ҳали жанглар давом этаётганини билдирган.