Туркия президенти Ражаб Тоййиб Эрдўғон Россия раҳбари Владимир Путин билан Сочидаги учрашувдан сўнг журналистларга берган интервьюсида Украинада тинчлик ўрнатиш истиқболлари кўринмаётганини айтди. Бу ҳақда бир қатор турк ва рус нашрлари хабар берди.

Қайд этилишича, Эрдўғон Путин билан учрашув якунлангач, самолётда журналистлар билан суҳбатлашиб, уларга ташриф натижалари ҳақида сўзлаб берган.

«Биз Россия президенти, азиз дўстим жаноб Путиннинг таклифига биноан Сочига қилган ташрифимизни якунладик. Учрашувларимизда Россия билан икки томонлама муносабатларимизни, минтақавий ва глобал воқеаларни атрофлича муҳокама қилдик, келгуси давр ҳақида фикр алмашдик. Ҳозирги вақтда 69 миллиард долларни ташкил этган савдо ҳажмимиздаги ўсишни давом эттирмоқчимиз. Биргаликдаги саъй-ҳаракатларимиз билан мақсадимиз 100 миллиард долларга етишдир», – дейди у.

Шунингдек, Туркия раҳбари Украина масаласига тўхталиб, бу бўйича Туркиянинг тутган йўли ҳамда томонларни муросага келтириш бўйича амалга оширган саъй-ҳаракатлари ҳақида ҳам тўхталган.

«Туркиянинг Украинада давом этаётган урушга нисбатан позицияси аниқ. Биринчи кундан бошлаб биз доимо тинчлик, мулоқот ва дипломатияни ҳимоя қилдик. Яна қон тўкилишининг олдини олиш учун кўп меҳнат қилдик. Муаммони кўпайтириб, оловга мой қуйиш ўрнига, ҳар икки томоннинг бир фикрда учрашишини таъминлашга ҳаракат қилдик», – дея таъкидлайди Эрдўғон.

Туркия президенти Украинадаги уруш ҳали-ҳамон тўхтамаганини айтиб, истиқболда тинчликка эришиш учун умид кўринмаётганини билдирган.

«Бир ярим йилдан буён давом этаётган уруш, афсуски, ҳали ҳам тугамади. Истиқболда ҳам тинчликка эришиш учун умид йўқ. Туркия ўлароқ, томонлар талаб қилганда ўз бурчимизни бажаришга тайёр эканимизни яна бир бор таъкидладик, чунки бугунги урушда ғолиб бўлмайди, тинчликдан эса ҳеч ким ютқазмайди. Худди шунинг учун, биз маҳбуслар алмашинуви ва Запорожье атом электр станцияси каби масалаларда ҳам ёрдамчи ролимизни давом эттирамиз. Умидимиз шуки, икки қўшнимиз ва минтақамизга зарар етказган бу уруш халқаро ҳуқуқ асосида адолатли ва мустаҳкам тинчлик билан якунланади», – дея сўзларини якунлайди Туркия етакчиси.

Эслатиб ўтамиз, Туркия Украина урушининг илк ойларидан бошлаб икки томон ўртасидаги музокараларда воситачи бўлди. Хусусан, 2022 йилнинг март ойида Истанбул шаҳрида Россия ва Украина ўртасида тинчлик музокаралари ўтказилган, унда Эрдўғоннинг шахсан ўзи нутқ сўзлаган эди.