Янги Зеландия ҳукумати 23 нафар россияликка қарши санкциялар киритди. Улар орасида Биринчи канал бош директори Константин Эрнст ҳамда Россия Рақамли ривожланиш, телекоммуникациялар ва оммавий ахборот воситалари вазирлиги раҳбари Максут Шадаев ҳам бор. Бу ҳақда мамлакат ТИВга таяниб, «Коммерсантъ» хабар берди.

Янги Зеландия ташқи ишлар вазири Наная Махутанинг маълум қилишича, санкциялар рўйхатига киритилган шахслар жамоатчилик фикрига тўғридан тўғри таъсир ўтказиш имкониятига эга ва улар Украинадаги қуролли можаро бўйича ёлғон маълумотлар тарқатмоқда.

Эрнст ва Шадаевдан ташқари рўйхатдан Россия ОАВларининг асосий ходимлари, шунингдек, «ИнфоРос» агентлиги, SouthFront веб-сайти ва Стратегик маданият жамғармаси киритилган.

Янги Зеландияда март ойида Россияга нисбатан қабул қилинган санкцияга оид қонун билан ҳозирга қарад 1,2 мингдан ортиқ Россия жисмоний ва юридик шахслари «қора рўйхат»га киритилган. Бундан ташқари, кўрилган савдо чоралари натижасида ўзаро товар айирбошлаш ҳажми кескин қисқарган.

Аввалроқ Евроиттифоқ Россияга қарши саккизинчи санкциялар пакетини тасдиқлагани, шунингдек, ЕИ Россияга дрон сотгани учун Эронга янги санкциялар қўллагани ҳамда Европа Иттифоқи Туркияга ҳам санкция қўллаши мумкинлиги ҳақида хабар берилганди.