Энергетика вазирлиги ҳузуридаги «Ўзэнергоинспекция» ДХХ, Бош прокуратура, электр ва газ таъминоти корхоналари мутахассислари билан ҳамкорликда 2023 йилнинг декабр ойи 15 кунида ўтказган назорат тадбирларида 411 нафар истеъмолчининг табиий газ ва электр энергиясидан ноқонуний фойдаланиши натижасида давлат манфаатларига жами 73 миллиард 274 миллион сўмлик зарар келтирилганлигини аниқлади.

Жумладан, Тошкент вилоятида 20 та ҳолатда тизимнинг 25 миллиард 293 миллион сўмлик, Тошкент шаҳрида 30 та ҳолатда тизимдаги 11 миллиард 308 миллион сўмликдан зиёд ва Фарғона вилоятида 52 та ҳолатда тизимнинг 7 миллиард сўмликдан зиёд энергоресурсларии талон-торож қилинган.

«Ушбу ресурсларга талаб ортган пайтда ҳам улардан айрим ʼтадбиркорʼларнинг ноқонуний ва ўғринча фойдаланишлари тармоқларда ортиқча юкланишларга ҳамда энергия ресурслар таъминоти барқарорлигига жиддий таъсир кўрсатмоқда», — дейилган хабарда.

Электр энергияси, нефт маҳсулотлари ва газдан фойдаланишни назорат қилиш инспекциясининг маълум қилишича, қоидабузар истеъмолчиларга нисбатан белгиланган тартибда чоралар кўриш учун тегишли ҳужжатлар ҳуқуқни муҳофаза қилувчи органларга тақдим этилган.

Аввалроқ, Тошкент вилоятида оҳак цехи учун 394,2 млн сўмлик табиий газ ўғирлангани ҳақда хабар берилганди. Шунингдек, Наманганда «свет»дан ноқонуний фойдаланиб келган МЧЖ аниқланганди.