Конго Демократик Республикасида қора ўлат эпидемияси бошланди. Бу ҳақда Итурий вилояти соғлиқни сақлаш бошқармаси бошлиғи Патрик Карамуранинг баёнотига асосланиб, «Jeune Afrique» хабар берди.

Таъкидланишича, мамлакат ҳудудида, бундан ташқари, хасталикнинг ўпка ва септик тури билан касалланиш ҳолатлари ҳам қайд этилган. Сўнгги маълумотларга кўра, 520 дан ортиқ киши хасталикни юқтирган, 31 киши вафот этган.

Нью-Йоркда жойлашган «Ecohealth Alliance» нодавлат ташкилоти эпидемиологи Анна Лодисуанинг маълум қилишича, юқтириш ҳолатлари 2020 йилнинг 15 ноябридан 13 декабригача бўлган давр мобайнида қайд этила бошланган. Инфекцияни юқтирганларнинг ўртача ёши 13, энг кекса беморники эса 73 ёшни ташкил этган.

Аввалроқ Хитойда ўлатдан бир киши вафот этгандан кейин карантин киритилгани ҳақида хабар берилган, шунингдек, АҚШда қора ўлат юқтириб олган инсон аниқлангани маълум қилинганди.