Uzbekistan Airports матбуот хизмати 18 январь куни янги Centrum Air миллий авиакомпаниясининг иккита самолёти Тошкент халқаро аэропортига келиб қўнганини маълум қилди. Вильнюсдан соат 19:07 ва 19:18 да етиб келган самолётларни авиакомпания раҳбарияти, журналистлар ва авиаспоттерлар тантанали равишда кутиб олган.

Қайд этилишича, иккита Airbus А320-232 Centrum Air компаниясининг биринчи йўловчи самолёти бўлган. Яқин келажакда авиаташувчи яна бир йўловчи борти — Boeing 737’ни сотиб олишни режалаштирмоқда.

Centrum Air арзон нархларда ташувчи бўлиб, унинг мақсади — «ҳамёнбоп ички ва халқаро рейсларни таъминлаш» ва «рақобатбардош сифатга эришиш».

Aerospace Lad маълумотларига кўра, Centrum Air авиакомпанияси My Freighter хусусий юк ташувчи компанияси томонидан ташкил этилган.

Эслатиб ўтамиз, 2021 йил ноябрда Ўзбекистонда Uzbekistan Airports АЖ Silk Avia минтақавий шўба авиакомпаниясини ташкил этилганди. Янги авиакомпания 2022 йилдан парвозларни бошлашни режалаштирган эди. Silk Avia авиакомпанияси 2021 йилнинг сентябрь ойида рўйхатга олинган. Uzbekistan Airports ва HAS Aviation GT LLC МЧЖ ўртасида минтақавий авиакомпанияни яратиш бўйича шартнома имзоланган.

Шунингдек, ўша йилнинг март ойида Монополияга қарши курашиш қўмитаси раиси ўринбосари Фаррух Карабаев Ўзбекистонда арзон нархларга эга авиакомпания фаолият бошлашини маълум қилганди. Апрелда эса Шавкат Мирзиёев Uzbekistan Airways ҳамда Uzbekistan Airports акциядорлик жамиятларини трансформация қилиш чора-тадбирлари тақдимоти билан танишган.